ہر سِمْت ہے گَہرا سَنّاٹا، یَہاں کوئی نَہیں

 ہر سِمْت ہے گَہرا سَنّاٹا، یَہاں کوئی نَہیں

میں تَہہ خانے بھی جھانک آیا، یَہاں کوئی نَہیں

یہاں نَوْبَت بَجتی تھی، یَہاں ہاتھی جُھومتے تھے

دِل ہے اب اُجڑا دَروازہ، یَہاں کوئی نَہیں

تُم تَھکے ہوئے تو ہو لیکِن ایک بات سُنو

یَہاں رات مُسافِر مَت رُکنا، یَہاں کوئی نَہیں

یَہاں کوئی نَہیں کِیوں تارے خُود کو جَلاتے ہیں؟

کوئی پُوچھو چاند سے کِیوں نِکلا؟ یَہاں کوئی نَہیں

یہاں آدھی رات تھی، میں نے جَب پُوچھا، کوئی ہے؟

کوئی گھور اَندھیرے میں چِیخا، یَہاں کوئی نَہیں

کِیوں پُھول اَنار کا آنکھیں مَل ‌مَل روتا ہے؟

کِیوں مہکا بُوٹا تُلسی کا؟ یَہاں کوئی نَہیں

کِیوں گِیلی ریت نے جس میں ٹَھنڈی سانس بَھری؟

کِیوں گَھڑے نے پانی چَھلکایا؟ یَہاں کوئی نَہیں

کِیوں پکی ہوئی گَندُم نے بالی لَہْرائی؟

کِیوں چَلی مُوافِق ہو کے ہوا؟ یَہاں کوئی نَہیں

کِیوں کَٹی ہُوئی سَرْسوں نے مِرا چہرہ چُوما؟

کیا کوئی نَہیں یَہاں میرے سِوا؟ یَہاں کوئی نَہیں

سَب بَھرے ہَیں مال اَسباب سے کوٹھے، چوبارے

سُنسان مگر قَریہ سارا، یَہاں کوئی نَہیں

کَل تَک تو سَب آباد تھے، شاد تھے بَستی میں

جو کچھ بھی ہُوا ہے، آج ہُوا، یَہاں کوئی نَہیں

میزوں پر کھانے چُنے ہیں، کُرسِیاں خالی ہیں

کیا جانِیے اُتری کیسی بلا؟ یَہاں کوئی نَہیں