جو تَخت پَر تھا، اُسے گِرَفتار کَر چُکے ہیں

جو تَخت پَر تھا، اُسے گِرَفتار کَر چُکے ہیں

پھِر اِک نیا بادشاہ تَیّار کَر چُکے ہیں

یُونہی بَغاوَت کا ہَم نے پَرچَم نَہیں اُٹھایا

جو خَلوَتی ہیں، اُنھیں طَرَفدار کَر چُکے ہیں

جو ہو سَکے تو اَب اَپنا طَرزِ سُخَن نِکالیں

بہت مِری پَیرَوی مرے یار کَر چُکے ہیں

کوئی سَواری نہ آئے اَب دِل کے راستے سے

کہ اِس طَرَف سے بَلَند دِیوار کَر چُکے ہیں

مِلیں جو زیرِ زَمِیں تو عُشّاق کو بَتانا

زَمِیں پَر ہَم حُسْن کو وفادار کَر چُکے ہیں

سَفَر پَر نِکلے ہُوئے ہیں بَچّے اور اَپنی حالَت

کُچھ اِس طَرْح ہے کہ سِینہ گُلزار کَر چُکے ہیں