یَہی مِٹّی سونا چاندی ہے جَیسی بھی ہے

یَہی مِٹّی سونا چاندی ہے جَیسی بھی ہے

یَہی مِٹّی اپنی مِٹّی ہے جَیسی بھی ہے

اِسی مِٹّی میں ہَم بِیج کی صُورَت جائیں گے

ہَمیں اَپنے اَندَر رَکھتی ہے جَیسی بھی ہے

اِسی مِٹّی سے ہَم پھُوٹَیں گے کونْپَل بَن کَر

یَہی مِٹّی ماں ہَمیں جَنتی ہے جَیسی بھی ہے

اِسی مِٹّی نے ہَمیں دُودھ پِلایا، بَڑے ہُوئے

ہَمیں پاؤں پاؤں چَلاتی ہے جَیسی بھی ہے

اِسی مِٹّی میں اَجداد کی مِٹّی شامِل ہے

یَہی خُون رَگوں میں بَنتی ہے جَیسی بھی ہے

اِسی مِٹّی نے ہَمیں بادَل اور ہوائیں دِیں

یَہی چُھو کے فَلَک کو آتی ہے جَیسی بھی ہے

اِسی مِٹّی نے ہَمیں شَربَت، شَہْد، شَرابَیں دیں

یَہی ہونٹوں کی شِیرِینی ہے جَیسی بھی ہے

اِسی مِٹّی سے زَیتُون کے باغ اُگائیں گے

یَہی غَرناطہ، یَہی سِسِلی ہے جَیسی بھی ہے