تُم تَک نَہیں پہنچی خَبَر؟ میں ہو چُکا مَسْنَد نَشِیں

تُم تَک نَہیں پہنچی خَبَر؟ میں ہو چُکا مَسْنَد نَشِیں

اے آسْماں نِیچے اُتَر، اُٹھ کَر کھَڑی ہو اے زَمِیں

پھُولوں، پَرِندوں، تِتلِیوں کا بال بھی بَیکا نہ ہو

سُننا نَہِیں چاہُوں گا مَیں کوئی خَبَرِ اَندوہْ گِیں

کَل صُبْح دَم اِس قَصْر کی دِیوار کو ڈھاؤں گا مَیں

مَوجُود ہوں دَرْویش، جِتنے ہَیں یَہاں گوشۂ نَشِیں

یہ پیڑ کے نِیچے بِچھا میرا ہی دَسْتَرْخوان ہے

اِس پر سَجانا ہے اَبھی زَیتون اور نانِ جَویں

عُشّاق سارے چَل دِیے زُلفیں تِری چُھوْتے ہُوئے

مُجھ کو بھی کیا مارے گی اَب اے زِندَگی، اے نازنِیں

کیا لَہْلَہاتی فَصْل ہے، کیا بالِیاں لَہْرائی ہیں

آنے دو جو مِسکِین ہیں، میری غَزَل کے خوشہ چِیں